Tinig sa Karimlan
Tinig Sa Karimlan
Ni Cherry V. Tubes
Nagsusumigaw na tinig,
Ako’y pakinggan mo.
Ang puso ko’y sawa na,
Sa mga pasakit na ito.
Hindi ko na ibig
Na muli pa ay maipagkanulo,
Nitong aking mga bibig
Na tanging ngalan mo lamang ang sinasambit.
Sa tuwina ay aking ninanais,
Na ang tinig mo ay marinig.
Pagka’t bawat mong kataga’y
Mga musika sa aking pandinig.
Subalit ano ang marapat kong gawin?
Gayong angkin mong tinig
Ay lubhang napakailap sa akin.
Magagawa ko bang sikilin,
Itong aking damdamin?
Saan ko nga ba hahanapin,
Mga tinig mong nagbibigay galak sa akin?
Kailangan ko pa bang tunguhin,
Ang mapanagnib na daanin?
O patuloy ko na lamang bang hihintayin,
Ang pagsapit ng takip-silim?
