Tagumpay Para sa Lahat
Tagumpay Para Sa Lahat
Ni Cherry V. Tubes
Ang tagumpay ay para sa lahat
Ng taong walang tigil sa pangangarap…
Ilang ulit mang madapa,
Ilang ulit mang mabigo,
Patuloy pa ring tatayo
Upang ang mithii’y matamo.
Ang tagumpay ay para sa lahat
Ng estudyanteng may pangarap…
Tambak man ang takdang aralin
At magkaro’n ng mababang marka,
Isip ay patuloy na lilinangin
Upang diplomang inaasam ay makuha.
Ang tagumpay ay para sa lahat
Ng mga magulang na puno ng pangarap…
Sunud-sunod man ang problema,
Mabaon man sa pagkakautang,
Patuloy pa ring magsusumikap,
Alang-alang sa kanilang mga anak.
Ang tagumpay ay para sa lahat
Ng pinunong maraming pangarap…
Ulanin man ng mga protesta
At batuhin ng mga paratang,
Patuloy pa ring maglilingkod,
Na may dangal at buong katapatan.
Ang tagumpay ay para sa lahat
Ng mga Pilipinong marunong mangarap…
Malugmok man sa kahirapan,
Dumanas man ng trahedya,
Patuloy pa ring lalaban,
Upang magandang bukas ay makamtan.
