ang maraming ako
Ako ay isang dahon…
Na itinatangay ng hangin sa dako roon.
Hindi ko alam kung saan ako patungo;
Hindi ko rin alam kung kailan ako hihinto…
Ako ay isang maskara…
Maskarang nakukulayan ng iba’t-ibang pintura.
Sa kaliwang bahagi ay nakangiti;
Sa kanang bahagi nama’y nakahikbi…
Ako ay isang gitara…
Gitarang tumutugtog ng iba’t-ibang musika.
Minsan ako ay nasa tono;
Kung minsan nama’y sintunado…
Ako ay isang ilaw…
Sa daang napaka panglaw.
Nais kong bigyang liwanag
Ang isang lugar na hindi mabanaag…
Ako ay isang tampipi…
Na ang layunin ay magkubli
Ng samu’t-saring kagamitan
Na pilit nang kinalimutan…
Ako ay ang maraming ako…
Na sa tuwina ay nagbabago
Ngunit may isang bagay na ako ay sigurado
Ako ay mananatili pa rin sa pagiging ako…..
